División de Honor Cadete Galega Sárdoma C.F. 12ª Xornada

Xuventú Aguiño 1 – Sárdoma CF 2

Como se vén recollendo acotío nas anteriores semanas nefasto encontro do equipo fronte ao derradeiro conxunto da táboa clasificatoria, que mostrou moita máis entrega e ilusión por levarse os tres puntos. E ben que puideron facelo, de estares máis acertados de cara á meta visitante; dispuxeron de non poucas oportunidades e algunhas bastante manifestas, mais quedou patente a súa posición e o feito de que sexan o único equipo da competición sen vitorias no seu casilleiro.
Respecto ao Sárdoma CF, só lamentar a preocupante desidia amosada onte perante un rival, en teoría, inferior e a galopante crise de actitude e xogo do grupo.

En canto ao encontro, adiantáronse os visitantes ao pouco de comezar este, nunha gran xogada individual de Pedro que rematou ao fondo das súa propia meta un defensa local. Xa no segundo tempo, e despois dunha primeira parte chea de despropósitos e imprecisións, igualou merecidamente, pois dispuxera doutra moi clara ocasión minutos antes, que tivo que atallar o cancerbeiro visitante despois de dúas grandes intervencións, a disputa o Xuventú Aguiño, tras efectuar o lanzamento dunha falta nun dos costados da área. Cando peor se presumía o desenlace do encontro para o Sárdoma CF, un riguroso penalti transformado por Pedro outorgoulle o inxusto triunfo para desconsolo e indignación das gradas, xogadores e corpo técnico local.

A vindeira cita será na tarde do próximo sábado fronte ao cuarto clasificado da liga, Montañeros, nas Relfas; a recompensa é ascender un banzo, como mínimo, na clasificación de gañar o encontro, o Sárdoma CF é quinto nestes intres, en detrimento do contrario, agardemos que os rapaces saian concienciados diso.

Resultados e clasificación.

Aburiño¡¡

División de Honor Cadete Galega Sárdoma C.F. 11ª Xornada

Sárdoma CF 1 – CD Areosa 2

Cúmulo de despropósitos nun partido para esquecer e mirar cara a diante, do que poucas conclusións se poden extraer; salvo as mesmas que se veñen recollendo sobre as últimas xornadas de liga.

Moi boa imaxe no primeiro tempo, que rematou cunha igualada a cero goles; e pésima segunda parte, na que se impuso a maior forza e orde dos visitantes, grazas á colaboración, cunha dúbida e un despiste, dos locatarios. Claro que se os cinco minutos de encontro un dos centrais do Areosa fose expulsado por unha escandalosa agresión, que viu todo o recinto deportivo, incluído o árbitro, merecedora soamente dunha tarxeta amarela; ou se vinte minutos despois, ese mesmo xogador comete unha pena máxima, que novamente ve todo o estadio, mais o arbitro o único que sinala é falta á beira da área, sen a conseguinte tarxeta amarela, que sumada á anterior novamente suporía a expulsión do terreo de xogo deste xogador, pois un pouco si condiciona o encontro; porque en fronte no tes a un calquera, senón o único equipo da competición capaz, a domicilio, de derrotar ao incontestable líder do grupo, o Deportivo da Coruña (1-3); e igualar co Celta de Vigo (1-1), en inferioridade numérica. No entanto tampouco serve de desculpa: o partido xa rematou, o resultado resulta inamovible e os últimos encontros o cadro vén adoecendo de certas carencias que lle impiden atopar o patrón de xogo alegre e dinámico dos primeiros compases de campionato. Agora mesmo, esta debería ser a principal preocupación do conxunto, xa que o calendario de aquí ao remate da primeira volta ten trampa.

Os goles producíronse todos nun segundo tempo dominado polo CD Areosa sen paliativos, mais axudado nos dous goles por senllos erros dos xogadores do Sárdoma CF. Os visitantes colocáronse dous a cero; e xa nas postrimerías do encontro Víctor acortou distancias no marcador, sen tempo para pouco máis.

Vindeira saída, fronte ao único conxunto que aínda non ten vitorias, o Xuventú Aguiño; de aí o dun calendario con trampa.

Resultados e clasificación.

Aburiño!!

División de Honor Cadete Galega Sárdoma C.F. 10ª Xornada

CD Ourense 1 – Sárdoma CF 2

Boa xornada para o Sárdoma CF que grazas á victoria sumada en Ourense, perante o equipo que dá nome á cidade das Burgas, encarámase ao segundo posto da clasificación, en detrimento do Celta de Vigo. Non foi un partido brillante, mais acadouse o obxectivo con solvencia e merecemento, nun segundo tempo sólido en defensa, salvo algún despiste puntual, e un ataque ben coordinado, que permitiu acadar frecuentes achegamentos á meta ourensá aínda que a puntería non estivese todo o centrada que os dianteiros desexarían. Algo do que se pode adoecer e laiar nas dúas derradeiras xornadas o equipo, menos se cadra nesta grazas o triunfo logrado, e que tamén lle ten ocorrido nalgún outro encontro no que non debeu sufrir para acadar a vitoria.

Ao tempo de lecer a disputa chegou igualada por mor da pena máxima transformada por Kevin, para o Sárdoma CF, e o tanto conseguido polo ariete local cando xa esmorecía o tempo para chegar o remate da primeira parte. No segundo tempo, a presión, a necesidade e a mellor combinación en ataque dos visitantes permitiulles sumar un novo gol, acadado por Pedro, que ó remate outorgaríalles os tres puntos.

Na vindeira fin de semana hai derbi fronte ao Areosa, un rival que se atopa preto da cabeza nestes intres, na cuarta praza, e a dous puntos do Sárdoma CF, polo que se acadasen a vitoria superarían a estes na clasificación. Para o Sárdoma CF é unha magnifica oportunidade de sumar tres puntos contra un rival directo na clasificación, ata agora dúas igualadas fronte os equipos punteiros, asomarse un pouco máis á barreira dos trinta puntos e conservar esa segunda praza, tan disputada e devecida por varios conxuntos. O primeiro posto ten dono dende fai varias xornadas, Deportivo da Coruña, e semella un aspirante moi serio a conservalo ata o final da liga.

Resultados e clasificación.

Aburiño!!

División de Honor Cadete Galega Sárdoma C.F. 9ª Xornada

Sárdoma CF 1 – Pabellón Ourense 2

Inmerecida derrota do conxunto vigués perante un Pabellón Ourense que soubo sacar proveito das súas oportunidades de gol; unha vitoria práctica e rañicas, no entanto sérvelles para consolidalos na zona media da clasificación. A tremenda superioridade dos locais no segundo tempo, con varias manifestas ocasións ante o marco visitante, non se viu recompensada nun suficiente bagaxe goleador, salvo nun acercamento que se saldou coa penalización do primeiro penalti da temporada, transformado por Pedro, co que superar o temperá gol dos ourensáns; tanta ansiedade e precipitación rematou traizoando ao conxunto olívico, que nunha perda de balón tralo saque dun falta favorable no campo do rival, preto da área de meta, converteu unha posibilidade propicia nun contragolpe que rematou coa sinalización dun inexistente penalti, co que o equipo das burgas acadou a vitoria.

Unha derrota para aprender e concienciarse ante os próximos envites que van resultar tremendamente exixentes. O equipo segue na puxa por acadar canto máis pronto os trinta puntos que lle permitan xogar con menos agonía e apresuramento coa que veñen afrontando os últimos encontros.

Respecto do gran partido da xornada, o Deportivo da Coruña pasou por enriba do Celta de Vigo nun gran segundo tempo, merecendo un maior premio polo seu dominio e pola cantidade de achegamentos á meta viguesa. Mais a disputa rematou nunha igualada a un tanto que deixa a clasificación apertada na cabeza, co Montañeros novamente en liza.

O vindeiro enfrontamento será contra CD Ourense, xa como visitantes, despois dos dous encontros como locais; outro dos conxuntos da cidade das Burgas, mais este si con moitas maiores necesidades das que traían os seus veciños.

Resultados e clasificación.

Aburiño!!

División de Honor Cadete Galega Sárdoma C.F. 7ª e 8ª Xornadas

CD Conxo 0 – Sárdoma CF 2

Sárdoma CF 3 – Val Miñor 2

Continúa a boa xeira de resultados a prol do equipo vigués. Á saída á parroquia de Santa María de Conxo, en Santiago de Compostela, onde se sumaron os tres puntos contra o CD Conxo, hai que engadir unha nova vitoria como locais fronte o Val Miñor. A primeira foi un triunfo traballado e asentado nos piares básicos do traballo e esforzo colectivo, iso si, refrendados en dúas xogadas puntuais no primeiro tempo que se resolveron en dous acertos do dianteiro Pedro. O encontro disputouse en campo de terra, nada habitual nos tempos actuais, no canto de dirimirse no céspede do campo de herba que está xusto a carón do outro. Ao final sufriuse demais, no entanto entre as marabillosas e acertadas intervencións do cancerbeiro Iago e o infortunio dos dianteiros locais o marcador non sufriu variación ningunha.

Nesta pasada fin de semana máis do mesmo, mais comeza a ser costume. Moito sufrimento para o final, despois de ir ganando a meirande parte do segundo tempo por tres goles a un, un penalti transformado polo Val Miñor nas postrimerías do encontro a piques estivo de provocar unha das sorpresas da xornada. O partido comezou dun xeito extraordinario con dous goles en cinco minutos, o primeiro dun factura magnífica, a favor dos locais. Todo semellaba encarrilado ata que o árbitro, máis os xuíces de liña, decidiron converterse tamén en protagonistas da disputa. Dunha clamorosa e fragrante falta naceu o primeiro tanto dos visitantes, o que lles serviu para manter a ilusión de acadar a igualada antes de rematar o primeiro tempo; porén, entre Pedro, novamente dous chicharros, e o gardameta Saúl encargáronse de impedirllo. Co tres a un chegouse ao tempo de lecer, e a continuación transcorreu sen maiores sobresaltos ata a sinalización do xa referido máximo castigo.

Dúas vitorias apertadas, é a primeira moi sufrida, que só veñen a confirmar o xa constatado en anteriores xornadas, non hai dous encontros iguais, nin rival asequible; un despiste nunha xogada, ou un intre de relaxación, poden converter unha alegría nunha decepción. Como dicía Hebbel, “crer posible algo é facelo certo”.

Seguinte parada, outravolta como locais, nas Relfas, fronte ao Pabellón Ourense esta próxima fin de semana; outro conxunto que abofé non facilitará para nada o camiño do Sárdoma CF. No entanto, sen dúbida, o partido da xornada, que eclipsará o resto de encontros, é o que disputarán na Madroa Celta de Vigo e Deportivo da Coruña, segundo e primeiro clasificados, na busca da primeira praza uns e asentar esa mesma posición fronte ao eterno rival os outros.

Resultados e clasificación 7ª Xornada.
Resultados e clasificación 8ª Xornada.

Aburiño!!