División de Honor Cadete Galega Sárdoma C.F. 6ª Xornada

Sárdoma CF 2 – Rápido de Bouzas 1

Apurada e costosa vitoria do conxunto anfitrión nas Relfas, máis polo que reflexa o marcador final que polos méritos contraídos ó longo de todo o encontro polos dous conxuntos; máis favorables estes os intereses do Sárdoma CF.

Xa nas últimas semanas o equipo tende a comezar os encontros ben organizado e manexando o tempo e ritmo de balón, mais cando as cousas semellan estar controladas e que a disputa para discorrer por uns cauces se non serenos, algo menos desacougantes, todo se complica.
Nunha desafortunada xogada dos visitantes o esférico coouse na súa propia meta adiantando así os locais, que noutro maxistral lanzamento de libre directo de Víctor colocaba o dous a cero no simultáneo e encarrilaba o partido. Ou iso semellaba, porque entre o xuíz de liña da banda dereita, que se dedicou a levantar coma un resorte a bandeirola todo o encontro, tanto para uns como para outros, e o xuíz máximo encargado de dirimir a contenda decidiron que os locais deberían sufrir si ou si. E tanto foi así, que nunha pena máxima que o árbitro se sacou da chisteira, porque llo pitaron os xogadores e seareiros (hooligans) do R. de Bouzas, este conseguiron recortar distancias antes de chegar o tempo de lecer.

E o segundo tempo foi un continuo sufrir, nas últimas datas o conxunto cóstalle mergullarse nos segundos tempos, ou polo menos manter a organización dentro do campo, conservar e desprazar o balón con solvencia, aínda que aos arreóns si consigue facer moito dano, proba diso foron dous claros enfrontamentos directos co meta rival que non remataron nas mallas por precitación. Tamén Tensi nunha falta e noutro lanzamento dende fóra da área puido sentenzar o encontro, mais a dureza e brusquidade emprega polos boucenses deixouse notar durante todo o segundo tempo e apenas si houbo xogo fluído. Dixen que non ía falar dos árbitros, mais non vou deixar pasar a oportunidade de referirme á pouca personalidade dalgúns persoeiros deste colectivo que se deixan influenciar polos elementos externos e acaban pitando todo o que o afeccionado lles solicita, como ocorreu nesta fin de semana. En fin, lamentable, nin criterio, nin carácter, nin tolerancia, nin diálogo, nin prestancia,… un dislate, é todas as semanas ocorre o mesmo conto. Segunda semana na que agarran descaradamente a Pedro cando se dirixe a meta dentro da área contraria, e segunda semana que voa outro penalti. Non sei, terán que zoscarlle, romperlle unha perna ou tronzarlle un xeonllo, porque senón dubidou eu que algún se atreva a castigar unha impunidade se o rapaz non cae ao chan morto da dor. Pois nada, que entre unhas cousas e outras, que si, outra semana que ao equipo lle costou xogar ben, no entanto sacou o marcador adiante e continúa cuarto, a un punto do líder Deportivo da Coruña, unha semana máis; e tamén máis preto dos trinta, xa só quedan dezaseis para chegar ao obxectivo. Por certo, non podo deixar de referirme á enorme intervención de Iago, o porteiro do Sárdoma, ante unha xogada illada dos visitantes xa nas postrimerías do segundo tempo que puido supoñer a igualada visitante; recuando ante un globo do dianteiro boucense e sacando unha abraiante manopla para enviar a pelota ao córner.

Próximo encontro, dentro de sete días, na capital de Galiza. O grupo viaxa a Santa María de Conxo, din que é un dos desprazamentos máis complicados, polas dimensións do campo, a composición do mesmo (herba natural) e pola afervoada afección local, que hai na competición. Dito isto, despois de seis xornadas, campos fáciles nin un só, e seareiros apaixonados e entusiastas a eitos. Outrosí é o dos energúmenos que pululan por todas as terras, parece que a educación, o respecto e xustiza son meras utopías e ideais; coa clase de dirixentes políticos e o sistema educativo de hogano créanse bestas, no canto de persoas racionais.

Resultados e clasificación.

Saúdos e aburiño!!

División de Honor Cadete Galega Sárdoma C.F. 5ª Xornada

Ural CF 3 – Sárdoma CF 3

Decepción, desastre, empate e… ¡grazas!

Antes de comezar coa crónica deste encontro quero facer unha aclaración, o autor deste blogue, blog ou caderno de bitácora, descoñezo dende a miña humilde ignorancia se existen máis acepcións para encumalo na propia lingua da Galiza, como os galeguistas acérrimos máis cómodos se sintan, pertence a un afeccionado ao conxunto vigues do Sárdoma CF. Qué quero dicir con isto, pois que calquera dos comentarios vertidos por min son da miña propia responsabilidade e non teñen ningunha relación nin afinidade coa entidade deportiva viguesa. É a mirada persoal dos encontros que disputa o equipo dun seareiro, poida que moitas veces partidista, aínda que trate de ser o máis obxectivo posible dende o meu criterio persoal, que non ten porque coincidir cos dos membros dos outros equipos; pero creo que xamais, e testumuños son as entradas que se poden ler no blog, fixen ningún tipo de comentario ferinte ou despectivo cara a ningún conxunto rival, máis ben todo o contrario, sempre empreguei un ton cauteloso, educado e respectuoso para todos eles.
Respecto dos comentarios arbitrais, ó final da pasada temporada fixen algún que outro apuntamento desacertado e desta temporada xa non lembro se también nalgún intre cheguei a facer algunha alusión o exercicio da figura que se encarga de manter a orde nas disputas. Son consciente de que o seu labor é difícil e complexo, moito máis cando carecen de xuíces de liña, e noutras aínda que os teñan tampouco lles axudan en demasía en determinados casos, por iso a partires de agora limitareime a mencionar o que se sancionou no terreo de xogo pero sen valorar se foi acertado ou desatinado, porque o feito xa non ten volta atrás e non merece a pena barrenar sobre acontecementos que uns ven cadaquén co criterio que máis lle favorece.

No tocante o encontro supoño que ó remate do mesmo todos quedaron defraudados, uns porque cando tiñan o partido na man deixárono escapar nun nefasta media hora e os outros porque co partido perdido, tirando de orgullo e caste, levantaron un resultado adverso e dispuxeron nun final agónico dun penalti co tempo cumprido que non chegaron a materializar; o que houbese suposto unha remontada épica, desas que encumbran a vencedores e desalentan os caídos.

En liñas xerais foi un partido malo, polo que atangue o Sárdoma C.F. o peor dos disputados, souberon sobrepoñerse co un a cero en contra e situarse por riba xa no primeiro tempo. Pero xamais tiveron o que nos partidos anteriores, o dominio do xogo e o control do balón, por iso un erro defensivo costoulles o primeiro tanto e de milagre, ou máis ben pola axuda desinteresada do liña, o segundo antes de chegar o descanso, un gol anulado nun fóra de xogo máis ca discutible, noutro exceso de confianza tanto da zaga defensiva como do gardameta. O un a dous no tempo de lecer máis ca xustiza reflexaba a efectividade de cara á meta contraria dun equipo sobre o outro.

O segundo tempo comezou con máis dominio e xogo dos vigueses, que puxeron o terceiro nunha rápida internada do extremo dereito pola banda, cun pase atrás que non desaproveitou o xogador que chegaba dende a liña de atrás. Nese intre parecía que o encontro estaba favorable, resultado e control do esférico pertencían ao Sárdoma, pero se algo non se lle pode conceder a estes rivais e facilidades; noutro erro aéreo chegou o dous a tres e a partir de aí todo se descontrolou, o Sárdoma perdeu o situación no campo, as ondadas dos coruñeses con balóns colgados ou desprazamentos en longo destrozaron os xogadores visitantes, que non souberon taponar con efectividade e contundencia as arremetidas dos dianteiros do Ural. Indecisións e imprecisións abocaron a contenda coma nun símil puxilístico a un desenfreado combate con golpes a destro e sinistro dun e doutro bando, do que o Ural sacou mellor rendemento. Se ben o Sárdoma puido matar o partido nun balón o longueiro, nun remate con todo favorable dentro do área pequena ou nunha discutible xogada que ben puido ser tanto falta á beira da área, como penalti se o árbitro deixa continuar a xogada e o defensa segue a obstruír o avance do dianteiro vigués; o Ural conseguiu a igualada, dispuxo dunha inmellorable oportunidade á reviravolta dentro do área pequena e marrou un penalti, que de ter deixado continuar a xogada o árbitro o gol debería ter subido ao marcador.

A conclusión a pesares de todo é que un punto axuda a seguir sumando cara aos trinta, que semella a barreira que pode outorgar a tranquilidade para logo afrontar con menos presión o resto da temporada. Algúns por aí adiante parecen pensar que este equipo vai buscando máis, que ten ínfulas de grandeza e que aspira a codearse entre os mellores da categoría; non sei como rematará toda esta historia, dunha cousa si estou seguro: a misión do equipo e facelo o mellor posible, intentando acadar a mellor clasificación que poida alcanzar e sempre, repito, sempre, respectando aos rivais e afrontando os partidos dende a modestia e a humildade, máis sen sentirse inferior a ninguén. Logo que cadaquén extraía as conclusións que lle parezan, para iso vivimos nun país onde a liberdade de opinión e o maior patrimonio que deixou a democracia.

Por certo, o próximo encontro dispútase nas Relfas o sábado, Sárdoma C.F. fronte ao Rápido de Bouzas. Apaixoante derbi vigués polo que se rumorea, coma sempre que se enfrontan conxuntos da cidade; máis neste caso son dúas entidades con certo parangón entre as categorías do fútbol base vigués e promete ser un encontro incerto e intenso.

Resultados e clasificación.

Aburiño!!

Edit.: Esquecéuseme outro detalle, nesta xornada o Sárdoma CF puido colocarse líder, nunha oportunidade inmellorable, tras a igualada do Celta de Vigo SAD co Areosa CF, non puido ser e continúa na cuarta posición, a un do líder que agora é o Deportivo da Coruña.

División de Honor Cadete Galega Sárdoma C.F. 4ª Xornada

Sárdoma CF 2 – Victoria 0

Suma e segue o equipo dos arrabaldes da cidade olívica no seu camiño cara á pronta conquista da tranquilidade na competición ligueira, despois de acadar onte unha moi importante vitoria por dous tantos a cero fronte ó conxunto coruñés do Victoria. Viña este último tentando conseguir a primeira vitoria da temporada tras tres igualadas consecutivas no inicio da competición, no entanto encontrouse, unha xornada máis, cun Sárdoma eficiente e sobrio que a pesares dos goles logrados a balón parado, tralo lanzamento dunha falta e o saque dun córner, dispuxo de non poucas opcións de adiantarse no marcado noutras situacións moito máis favorables. Así mesmo, o Victoria tamén puido facer o seu tanto moito antes e lograr un resultado positivo nos primeiros corenta minutos, pero ningún dos dous equipos estivo acertado de cara ás porterías e ambos os dous conxuntos encararon o camiño dos vestiarios co tanteador igualado do inicio do encontro.
No segundo tempo semellaba que mudaría o decorado cando os coruñeses controlaban mellor o xogo no medio do campo, aínda que sen inquedar apenas a portería dos locais. Foi entón cando tralo lanzamento dunha falta ó bordo da área conseguiron os vigueses colocar o marcador ó seu favor. Os da provincia da Coruña non se renderon e trataron de empatar case que a continuación, nun erro clamoroso do Sárdoma que permitiu un cara a cara dos visitantes co gardameta local mal resolto na finalización. E aí morreu o encontro, porque os locais xa non permitiron achegamentos moito máis perigosos, colocaron o dous a cero tras un saque de esquina e dispuxeron de tres ou catro oportunidades marradas practicamente na boca de gol, coas que remachar a contenda.

O dito, continúa a boa marcha do Sárdoma na súa andaina pola máxima competición da categoría cadete en Galiza; dez puntos sobre doce posibles, e tratando de aproveitar ó máximo a apacible atmosfera que reside no grupo de xogadores xunto ó corpo técnico e o bo entendemento dos primeiros no terreo de xogo, cunhas magníficas prestacións que lles están a outorgar unha marabillosa rendibilidade en canto a resultados polo de agora.

Na seguinte fin de semana o equipo desprázase ata A Coruña para render visita ó Ural, abofé outro complicado rival que non vai facer concesións gratuítas no seu campo. Agardemos que no traxecto de volta reine a satisfacción pola recompensa recadada e seguir dese xeito entre os primeiros postos da clasificación.

Resultados e clasificación.

Aburiño!!