División de Honor Cadete Galega Sárdoma C.F. 3ª Xornada

Ponte Ourense 2 – Sárdoma CF 4

Xusta e merecida vitoria, dun equipo combativo e correoso (Ollo!, que está descrición leva retranca polo medio; ver páxina do R.C. Celta de Vigo e os comentarios vertidos sobre o encontro disputado hai unha semana dende a web oficial do club céltico), por dous goles a catro, en Oira, fronte ó Ponte Ourense. Un triunfo importante, dado o empate acadado na xornada anterior co R.C. Celta que precisaba ser refrendado cos tres puntos, para adquirir tranquilidade no xeito de encarar próximos envites, co fin de asentarse canto antes nos postos máis folgados da clasificación.

Pouco a destacar do encontro, salvo o feixe de tarxetas amarelas coas que regresa o equipo, seis se non me trabuco, máis unha vermella amosada ó primeiro adestrador por protestar, destas houbo como tres máis entre as amarelas; e convén engadir outra máis, totalmente desatinada, ó vergoñoso espectáculo ofrecido polo colexiado, por ir trotando a efectuar a botadura dun saque de esquina, que non sei como terán que ir os xogadores de agora en diante cando queiran realizar calquera acción a balón parado cando teñan que atravesar o campo dunha banda á outra, nun partido onde non houbo ningunha entrada que mereza o calificativo de desorbitada para tan excesivo e sangrante castigo. A única acción merecedora de tal calificativo pode considerarse un forte encontronazo nun balón dividido no aire, ó que Tensi máis outro xogador do equipo local foron pola súa disputa, resultando o peor parado este último, cun aparatoso hematoma producido ó redor do ollo dereito, froito da contundencia coa que ambos os dous xogadores perseguían a disputa do esférico.

Tras un gol temperá do equipo local, os visitantes souperon repoñerse e superar ó rival que onte tiñan en fronte. Sen un xogo brillante, coma o desenvolto nos dous primeiros encontros, e sen amosar tampouco unha abrumadora superioridade no plano futbolístico, xa que a contenda transcorreu dun xeito moi intermitente e trabado, por mor do sistema empregado polo conxunto anfitrión, a superioridade viuse clara e merecedoramente reflexada no marcador final, tanto polas oportunidades xeradas como pola proposta valente e arriscada coa que afronta cada encontro o Sárdoma C.F.. Convén salientar a mentalidade e a ambición do equipo nestas primeiras xornadas, rendendo a plantilla ó completo a un gran nivel en case todas as facetas do xogo.

O próximo encontro fronte o Victoria, da Coruña, nas Relfas, semella que será sufrido e complicado, non en tanto o conxunto coruñés presenta uns números que aconsellan prudencia e seriedade, tres igualadas e dous goles tanto a favor como en contra en tres xornadas suxiren unha custosa faena para tentaren batilos.

Resultados e clasificación.

Aburiño!!

División de Honor Cadete Galega Sárdoma C.F. 2ª Xornada

Pontevedra CF 1 – Sárdoma CF 3

Sárdoma CF 0 – Celta de Vigo SAD 0

Botou andar hai dúas xornadas a tempada de fútbol na máxima división do fútbol cadete na comunidade galega, e non puido ter mellor arranque o Sárdoma C.F., acadando unha vitoria como visitante e unha igualada na casa, este último punto sumado fronte a un dos equipos máis temibles da categoría e principal favorito ao título final na rexión.

No primeiro encontro disputado na Xunqueira diante do Pontevedra C.F., na tarde do sábado da pasada fin de semana, o Sárdoma C.F. alcanzou un importante triunfo no campo dun dos seus posibles rivais de cara á loita final pola permanencia, deixando unha moi grata imaxe e impresión no terreo de xogo. O resultado final de 1 a 3 reflicte con xustiza o acontencido durante os 80 min. de xogo e permitiu que o equipo afrontase con máis confianza e afouteza o encontro desta fin de semana co R.C. Celta de Vigo.

Na tarde de onte viviuse unha disputa intensa e incerta ata o derradeiro minuto de partido nas Relfas, con dous equipos dispostos a xogar e tocar o balón, pero con un clara superioridade no que ao fondo físico fai mención. No entanto, o Sárdoma comezou dominando encontro até que as forzas lle aguantaron os xogadores e protagonizou un entretido cara a cara nos primeiros 30 min. de contenda. Dende entón o Celta impuxo a súa maior fortaleza e resistencia física encadeando unha serie de manifestas ocasións que ningún dos seus dianteiros chegou a concretar, unhas veces pola gran defensa local, outras polas acertadas intervencións do carcerbeiro e nas máis polo aciago día dos lanzadores. Con todo, o Sárdoma xamais lle perdou a cara ao encontro, co empuxe dos visitantes, mailo esgotamento acumulado polo forte ritmo imposto ao longo de todo o partido, no segundo tempo os locais víronse obrigados a repregar liñas e defender dende moi atrás, o que facilitou as oportunidades do Celta e algunha contra perigosa do Sárdoma que logrou inquedar á defensa e o porteiro visitantes en contadas oportunidades, mais sempre coa pantasma de ameaza latente rondando a portería. O punto tralo empate a cero goles sabe a moito, polo xa dito e porque querías que non o Celta sempre é un rival impoñente e respectable que vai dar lugar a moi poucas concesións. Non obstante, tralo visto onte o Sárdoma sae fortalecido pola imaxe amosada e a oposición exercida contra un dos “cocos” da categoría, o que tería que axudar a afronta-las vindeiras xornadas con optimismo, mais sen relaxación.

Resultados e clasificación 1ª Xornada.
Resultados e clasificación 2ª Xornada.

Aburiño!!